Жараланған бөрідей

Жараланған бөрідей,
қан сорғалап, жарамнан,
Бөрісі емес, адамның,
иттеріне таланғам.
Ауыр ойлар жаншылап...
сансырап та, қансырап –
Ұлылықты іздеймін,
ұланғайыр Даламнан.

Боз сағымның ішінен,
көргендеймін боз атты,
Кісінеп ед шұрқырап,
жүрегімді боздатты...
Көне сүрлеу бойымен,
Көш – керуен елесі,
Көңілдегі шерімді,
көсеп-көсеп қоздатты.

Әруағы шақырып,
ақсақалды атаның,
ақша бұлт секілді,
ақ киізден – шапаның...
Естілгендей мақамы,
ескі сарын батаның,
Желмаяның ізімен,
желіп бара жатамын...

Тас қаладан қашқақтап,
нем бар еді далада?!
Ем іздедім бе екен,
өзектегі жарама?
Ұлылықтың сарқытын,
табатындай Санама,
Үмітпенен қараймын,
ұланғайыр Далама.

28.09.2012 ж.